LA UNION – Indatag ti religious groups ken abogado iti maikatlo nga impeachment complaint kontra kenni Vice President Sara Duterte iti opisina ni House of Representative Secretary General Reginald Velasco itay agsapa, Disyembre 19.
Indaulwan ni Atty. Amando Virgil Ligutan, counsel dagiti complainant iti panangisumite ti reklamo.
Daytoy ket inyindurso da Camarines Sur Rep. Gabriel Bordado ken House Deputy Minority Leader/AAMBIS-OWA party-list Rep. Lex Anthony Colada.
Iti endorso ti House member ket kasapolan tapno makuna a verified iti naidatag nga impeachment complaint.
Maibasar iti kopiya ti complaint a naiprisenta iti media, iti nagbalin a ground wenno basaran para iti naidatag nga impeachment complaint kontra iti Bise Presidente ket iti culpable violation of the Constitution, panagpasoksok, graft and corruption ken betrayal of public trust.
Maipalagip a ti immuna nga impeachment complaint a naidatag kontra iti Bise Presidente ket indatag ti civil society organizations nga inyendorso ni Akbayan party-list Rep. Percival Cendaña idi Disyembre 2.
Iti met maikadwa ket naidatag idi Disyembre 4 nga indaulwan ti Bagong Alyansang Makabayan.
Nagramot dagiti naidatag nga impeachment complaint kenni VP Sara iti tengnga ti imbestigasyon ti House Committee on Good Government and Public Accountability iti Office of the Vice President ken Department of Education a sigud nga idaulwan ni VP Sara gaputi maipagarop a misuse iti confidential funds.
