LA UNION – Arestado iti maika-lima a suspek iti napasamak a gang rape idiay Sto. Tomas, La Union.
Binigbig ni PCol. Heryl Bruno, director iti La Union Police Provincial Office (LUPPO), iti akusado kas maysa a construction worker, agtawen ti 23 ken residente ti Sto. Tomas, La Union.
Natiliw ti rape suspect babaen iti bileg ti outstanding warrant of arrest nga inyisyu ti Regional Trial Court, Branch 32, idiay Agoo, La Union.
Naarestar ti Sto. Tomas Police Station iti suspek kalpasan ti dua a lawas a manhunt operation.
Kabayatanna, dagiti uppat a co-accused ti suspek iti kaso a rape ket immunan a naarestar idi December 10, 2024 idiay Sto. Tomas ken Agoo, La Union.
Maibasar iti police report, dagiti lima a suspek ket maipagarop a nangrames iti biktima a maysa a balasitang nga addaan ti mental condition iti abandonado a kubo iti igid ti baybay, agarop alas 6:00 ti rabii idi August 4, 2024.
