BR LA UNION – Agtultuloy a maipat-patungpal iti Project YAPAKK wenno “Yaman ken Ayat ti PNP agpaay ti Kakadwa para ti Kapia” nga addaan tarigagay a papigsaen ti suporta para kadagiti barangay tanod kas kabinnulig ti Philippine National Police (PNP) iti panangtaginayon ti urnos ken kapya iti kommunidad.
Babaen iti inisyatiba ni PMAJ Clinton P. Amawan, agdama a hepe ti Bangar Municipal Police Station (MPS), naituloy ti inyuswat na a proyekto para iti nadumaduma a barangay idiay ili ti Bangar.
Segun kenni Amawan, ti ili a Bangar ti addaan kadakkelan a bilang dagiti benepisyaryo a naikkan iti arwaten nu ikumpara iti dadduma nga ili a nangipatungpalanna iti programa.
Malaksid iti pares ti sapatos a naiwaras kadagiti barangay tanod, naipaayan da pay ti flashlight ken whistles, a kangrunaan nga alikamen iti inaldaw a panagpatrolyada ken panangresponde nu adda dagiti insidente iti masakupan da.
Iti agdama, ti programa ket addan iti maikalima a batch ti implementasyonna ken pakabuklan metten a 197 a barangay tanod ti nabenepisyaran.
Adda metten ti 17 a barangay ti nakaisayangkatan ti proyekto a mangsuporta iti amin a barangay tanod.
Malaksid dayta, tampok pay iti Project YAPAK ti agsasaruno a panagsanay a mangpalawa iti ammo ken paglaingan dagiti barangay tanod.
Karaman ditoy ti BPATs Training, panangisuro ti umno a teknik ti panangaresto, ken seminar maipapan iti Katarungang Pambarangay nga idauluan dagiti pannakabagi ti Public Attorney’s Office (PAO).
Target ti Bangar MPS a maileppas ti pannakaipatungpal ti proyekto sakbay nga agngudo ti Nobyembre tapno maipaayan amin dagiti 33 a barangay ti ili a Bangar iti kangrunaan a kasapolan ken panagsanay para kadagiti barangay tanod.
Immuna nga inyuswat ni Major Amawan ti nasao a proyekto idiay Pugo, La Union idi isuna ti hepe ti nasao nga ili idi tawen 2021.
Maipatpatungpal ti programa babaen ti suporta ken tulong nga ipapay ti lokal a gobyerno.
