BR LA UNION – Indeklara ti House Committee on Justice a sufficient in substance iti maikatlo ken maikapat nga impeachment complaint kontra kenni Vice President Sara Duterte.
Iti binnotosan, nakagun-od ti 54 a botos a pabor, maysa ti kontra, ken 0 abstentions manipud kenni Quezon City Rep. Jesus “Bong” Suntay.
Sakbay ti binnotosan, naaddaan ti nabara a sinnukat ti waragawag iti House Committee on Justice iti maikadwa nga aldaw ti deliberasyon dagiti mammanday linteg iti maikatlo nga impeachment complaint kontra kenni Vice President Duterte.
Ti maikatlo a reklamo ket inyindurso ni Mamamayang Liberal Party-list Rep. Leila de Lima, ken inlatag na iti innem a nagbalin a basaran iti reklamo.
Iti kangitingitan ti deliberasyon, sinaggaysa met ni Cagayan De Oro Congressman Rufus Rodriguez dagiti basaran ti maikatlo nga impeachment complaint.
Partikular ditoy iti maikadwa a basaran seknan iti maipagarop a plunder, malversation, ken graft nga adda pakainaiganna iti P112.5 million a confidential funds ti Department of Education.
Impunto ni Rodriguez a saan a mabalin a ma-impeach iti Bise Presidente gapu iti alegasyon idi isuna ti sekretaryo ti Department of Education.
Impaganetget ni Rodriguez, nga awan ti hurisdiksiyon iti impeachment court iti duly appointed a sekretaryo ti DepEd.
Ngem nainget a kinontra ni Rep Leila De Lima iti argumento ni Rep. Rodriguez a saan a sakop ti hurisdiksiyon ti komite iti alegasyon kenni VP Sara idi isuna pay ti sekretaryuo ti DepEd.
Nangipeksa met ti palawag ni Manila Rep. Benny Abante iti nagbalin a waragawag ni Rep. Rodriguez.
Impunto ti mammanday linteg a tarigagay ti komite a denggen iti indatag nga impeachment complaints kontra iti Bise Presidente ken saan a tapno i-impeach.
