Rinugianen ti Bureau of Immigration ti imbestigasyon iti impormasyon a naglibas ditoy pagilian ti self-confessed hitman a ni Edgar Matobato.
Segun kenni Immigration spokesperson Dana Sandoval, agingga ita ket saanda pay a nakumpirma no agpayso a nakalibasen ditoy pagilian ti indibidwal.
Ni Matobato ket maysa a self-confessed hitman ti mapapati a Davao Death Squad.
Maibasar iti report, adda itan iti protective custody ti International Criminal Court isuna ken nakatuding a tumulong iti imbestigasion ti International body kontra iti maipagarup a nadara a gubat kontra droga ti napalabas nga administrasion.
Immunan nga impalgak ni Matobato a responsable isuna kadagiti napasamak a serye ti pammapatay idi mayor paylaeng ti Davao City ni ex-PRRD.
Iti panagparangna iti imbestigasion ti Senado, kinunana a karaman pay ti Presidential Anti-Organized Crime Task Force sadiay siudad ti Davao a makin-aramid iti sumagmamano a serye ti pammapatay.
