BR LA UNION – Patien ni sigud a Supreme Court Justice Antonio Carpio a maipasango iti nakaro a legal a laban ti kampo ni sigud a President Rodrigo Duterte, gapu iti kaso a crimes against humanity a sangsangwenna iti International Criminal Court.
Daytoy ket gapu met iti ‘firsthand experience’ dagiti agserserbi a testigo kontra kenkuana, kas kadagiti nagpabigbig a miyembro ti Davao Death Squad (DDS) a maipagarop nga adda pakainaigan da iti pammapatay a maipab-pabasol iti sigud a presidente.
Impaganetget ni Carpio, iggemda ti personal a pannakaammo bayat ti panangisayangkatda iti pammapatay kas bilin ti sigud a presidente.
Kinuna na a narigat a sungbatan wenno kontraen dagiti nasao a testimonya.
Nupay kabaelan ti kampo ti sigud a presidente a kariten wenno kuestionaren ti legalidad ti pannakaarestona uray sakbay ti naituding a pannakadengngeg ti kaso inton Setyembre 2025, ken uray nu ideklara ti korte nga ilegal ti pannakaaresto, saan latta nga maapektaran ti hurisdiksiyon ti ICC.
Inlawlawag ti sigud a Supreme Court justice, nga awan ti pakainaigan ti ICC iti pannakaaresto a naaramid wenno napasamak ditoy Pilipinas ken gaputa naisuko kadakuada ni Duterte (suspect) ket agtalinaed ti hurisdiksiyon da kenkuana.
Immunan nga impaganetget ti legal team ti sigud a presidente a kidnapping iti naaramid a pannaka-aresto ni Duterte ken pannakai-surrender na kadagiti otoridad idiay The Hague, Netherlands, a nakabase iti international tribunal.
