Personal a nagturong ken pormal a nangipila ti kaso ni Senador Risa Hontiveros ken iti legal team na iti Department of Justice partikular iti National Prosecution Service ti ahensia kontra kadagiti sumagmamano a mabigbig a Duterte Supporter Vloggers ken dagiti karaman nga indibiwal gapo kadagiti agwarwaras a video ti sigud a witness ti senado.
Iti nasao a kaso ket gapo iti panagwaras ti video ni Michael Maurillo, sigud a Senate Witness a nangibabawi ti testimonya na maipanggep iti kaso kontra kenni Pastor Apollo Quiboloy.
Dagiti indibidwal a pinilaan na ti kaso a cyber-libel ket isuda Atty. Ferdinand Topacio, online content creator a ni Byron Cristobal (alias Banat By), Jeffrey ‘Ka Eric Celiz’, Krizette ‘Kiffy’ Chi, Jose ‘Jay’ Sonza, ken Alex Destor (alias Tio Moren), karaman ni Maurillo.
Segun kenni Senador Hontiveros, babaen iti tulong ti National Bureau of Investigation (NBI) ket makolkolektan dagiti video a nagwaras ken naipost online a kontra wenno mangdaddadael kenkuana.
Innayon na pay, addaan da ti naan-anay nga ebidensya a mangpaneknek kadagiti akusasyon kontra kadagiti nadakamat a vloggers ken indibidwal.
Iti met dasig ni Atty. Ferdinand Topacio, urayen na pay iti kopya ti reklamo sakbay a mangibinglay ti statement.#
