Simmungbat iti Malacañang kadagiti alegasion ni sigud nga Ako Bicol Partylist Representative Zaldy Co kontra kenni Presidente Ferdinand Marcos Jr.
Segun kenni Palace Press Officer Undersecretary Claire Castro, dagitoy a waragawag ni Co ket kinaulbod ken propaganda nga agpadpadagsen laeng iti pagsungbatan na iti pagilian.
Impaganetget na a nalawag nga inaklon ti sigud a manmanday-linteg iti bukod na a papel iti makunkuna nga “insertions” iti 2025 national budget.
Saan met a mailibak a dagiti panagbalbaliw iti National Expenditure Program (NEP) 2025 ket nakapungtotan ti Presidente ken nagdesision nga i-veto dagiti sumagmamano a line items nga aggatad ti ₱194 bilyon. Isu a tinakderan ti kampona a maisupadi daytoy iti waragawag ni Co nga ₱100 billion insertion.
Kenuna met ni Presidente Marcos, saan na kayat a patulan ken saan a rumbeng a sungbatan dagiti nasao nga akusasion.
Waragawag na daytoy kabayatan iti panagsarungkar na idiay Negros Occidental idi kalman tapno imanehar iti agtultuloy a relief ken rehabilitations efforts kalpasan ti Bagyong Tino.
Kabayatanna, binabalaw met ti Malacañang dagiti ladawan nga impakita ni Co nga addaan ti petsa nga Enero, Mayo, Hunyo, Agosto, ken Oktubre 2024.
Imbaga ni Castro a no dagiti insertions para iti 2025 Budget ket mapagsasaritaan idi 2024 partikular “idi nangrugi iti BICAM”, ket nalawag a maisupadi daytoy iti aktual a timeline agsipudta bulan ti Nobiembre 2024 a naglukat iti BICAM Conference para iti 2025 budget.
Pagduduaan ti kampo no kasano a naipatulod dagiti “maleta” kadagiti nadakamat a bulan no saan pay met a nagrugi iti BICAM, kasta met no ania iti nagtaudan ti kuarta nga al-almanen ni Co.
Kinarit ti Malacañang iti sigud a manmanday-linteg a paneknekan dagiti alegasion, kangrunaan iti waragawag na nga awan iti kinupit na a pondo uray pay iggem na iti bileg para iti panangikabil ti proyekto iti budget.
Innayon na pay, nasken laeng a ni Co iti mismo a maimbestigaran tapno malawlawagan iti pagtataudan dagiti ibagbaga na nga istorya ken kinaulbod.#
