BR LA UNION – Nagkedked nga agkomento ti Malacañang sekan iti maipagarop a conflict of interest ni Senador Rodante Marcoleta iti imbestigasyon nga isay-sayangkat ti Senate Blue Ribbon Committee seknan iti anomalya dagiti flood control project.
Daytoy ket kalpasan a naipadamag iti maipagarop a koneksyon ti asawa ti senador iti insurance company ti contractor’s bond ti agassawa a Discaya a kabilang kadagiti maim-imbestigaran iti flood control scandal.
Segun kenni Palace Press Officer Claire Castro, ni laeng Senador Marcoleta iti makasungbat nu adda conflict of interest iti baetan ti personal a pakainaigan ken iti maisay-sayangkat nga imbestigasyon.
Saan kunana nga ammo ti Malacañang nu kasatnu kauneg iti maipagarop a koneksyon ti asawa ni Marcoleta iti insurance company, wenno anya a klase ti koneksiyon nga adda ti senador kadagiti Discaya.
Impaganetget ti Palasyo, a bay-an ni Sen. Marcoleta a law-lawagan ti mismo nga isyu ken nu adda epekto na iti panagtalinaed kas miyembro ti komite a mangduk-duktal kadagiti iregularidad iti flood control projects.
