LA UNION – Dead on arrival iti Ilocos Training and Regional Medical Center ti maysa a Malaysian senior citizen kalpasan a nagsagaba iti nakaro a sugat iti panagdinnungpar ti dua a motorsiklo idiay Brgy. Bagbag, ili ti Bauang, La Union.
Nabigbig ti biktima a ni Seow Thow Sang, 60-anyos.
Maibasar iti inisial nga imbestigasion ti Bauang Police Station, naamuan a daldalyasaten ti motorsiklo ni Sang ti national highway a sumarsaruno iti maysa pay a motorsiklo a minaneho ni Carlos Villanueva, 25-anyos, residente ti Bacsil, Bacnotan.
Nupay kasta, ditoy a kellaat a nagsikko pakanigid ti motorsiklo ni Villanueva isu a naidungpar ti motorsiklo ni Sang a maibagbaga a napaspas ti panagtarayna.
Dagus a naitaray iti ospital dagiti dua a driver ken ti backride ni Villanueva a ni Regina Villanueva ngem naideklara a natay ni Sang.
Iti agdama ket agtultuloy ti imbestigasion iti insidente, bayat a nakiumanen dagiti otoridad iti pamilia ti Malaysian iti ballasiw-taaw tapno maiproseso ti bangkay daytoy.
