BR LA UNION – Timpuar ti riribok iti parliamento idiay Turkey idi Miyerkoles, Pebrero 11, 2026 gaputi saan a panagtinnunos ti
ruling party ken oposisyon, seknan iti pannakadutok ti baro a Justice Minister.
Ginandat dagiti mammanday linteg ti oposisyon a lapdan iti panagsapata ni Istanbul Chief Prosecutor Akin Gurlek, a dinutokan ni President Recep Tayyip Erdogan, iti kangatuan a posisyon ti hudikatura.
Ti pannakadutok ni Gurlek ket paset ti maipatpatungpal a panagbalasa iti gabinete.
Gaputi rurod dagiti mammanday linteg, nagdidinnuron ken nagdi-dinnanog dagitoy.
Ni Gurlek a sigud nga Istanbul chief prosecutor, ti nangidaulo kadagiti high‑profile trials kontra iti sumagmamano a miyembro ti main opposition party a Republican People’s Party, ngem inawagan daytoy ti oposisyon a politically motivated.
Ginasut nga opisyal manipud iti naduma-duma nga ili a miyembro iti nasao a partido iti inarestar gaputi maipagarop a pakainaigan da iti korapsiyon.
