BR LA UNION – Dinayyeg ti magnitude 6.1 a gingined iti Turkey, partikular idiay northwestern province ti Balikesir idi kalman, Agosto 10, 2025 a nakatayan ti maysa nga indibiduwal, nakadunoran ti aganay 30 a tattao ken nakarsuodan iti nasurok maysa dosena a pasdek, maibasar iti report ti Associated Press (AP).
Nadetermina ti sentro iti gingined idiay ili ti Sindirgi iti kauneg a 10 kilometro.
Nailista ti nagsasaruno nga aftershocks, a narikna iti kaadayu a 200 kilometers (125 miles) amianan ti Istanbul, iti siyudad a pagnanaedan iti nasurok 16 million a tattao.
Natay iti maysa a nataengan a babai a nagaburan ti debris manipud ti narsuod a pasdek idiay Sindirgi bayat nga uppat ti na-rescue iti nasao a building, segun kenni Interior Minister Ali Yerlikaya.
Segun kenni Yerlikaya, pakabuklan a 16 a pasdek ken istruktura a pakairamanan iti dua a mosque minarets ti nag-collapse iti nasao a rehiyon.
Awan iti kritikal ti kondisyon na kadagiti 30 a nasugatan.
Kabayatanna, iti statement ni President Recep Tayyip Erdogan, kinuna na nga idaw-dawat na iti napaspas a recovery ti amin a naapektaran ti gingined.
Iti Turkey ket maysa kadagiti lugar ditoy lubong nga adda iti major fault lines isunga masansan ti gingined.
Maipalagip nga idi 2023, timmama ti magnitude 7.8 a gingined a nakatayan ti nasurok 53,000 a tattao ken nakadadaelan iti gasut a ribu a pasdek iti 11 a probinsiya idiay Turkey.
