LA UNION – Arestado ti maysa a mannalon gapu ti maipagarup a panagikot daytoy iti naduma-duma a kita iti paltog ken bala idiay Sitio Inasan ti Barangay Tubaday, Santol, La Union.
Nabigbig ti suspek a ni Alfonso Maging alyas “Allawas”, 50, agnanaed ti nasao a lugar.
Babaen iti bileg ti search warrant nga inyatnag ni Santol Municipal Trial Court Judge Narciso Mingua, ket inalikad dagiti kameng ti Santol Police Station ken 2nd Maneuver Platoon Base ti La Union Provincial Mobile Force Company (LUPMFC) iti balay ti suspek.
Kinumpiskar dagiti pulis manipud iti uneg ti pagnanaedan ti nadakamat a mannalon ti maysa a cal .45 ken maysa a cal .38 a paltog; karaman ti dua a magazines nga addaan ti pito a bala ti cal .45, ken maysa pay a kahon a naglaon iti 50 live ammos ti cal. 22.
Isagsagana metten ti pulisya ti kaso nga illegal possession of firearms and ammunitions kontra ti suspek. (Absalom Flores)
