Maisupadi kadagiti immun-una na a waragawag ket pinasingkedan ita iti aktres a ni Mariel Padilla a saan pay nga agretiro ti politika iti asawa na a ni Senador Robin Padilla.
Iti podcast ni Senadora Imee Marcos idi Mayo 16 ket kinuna ni Mariel nga adda pay iti miyon ti asawa na iti gobierno kasta met kadagiti supsuportaran na nga adbokasiya.
Segun pay kenkuana ket mapanpanunot na a nasaysayaat nu ituloy ni Robin ti termino na’t kina-Senador gapo kadagiti sektor a mangnamnama iti serbisyo na.
Inlawlawag ni Mariel a ti immun-una na a waragawag a “they don’t deserve him” ket maipanggep kadagiti kritiko ti asawa na a kas mamanday-linteg.
Sakbayna ket kinuna met ni Senador Robin a panggep nan nga adaywan iti politika ken panawan ti Pilipinas gapo iti pannakadismaya na iti sistema.
Idi agangay ket impeksa na manen iti posibilidad nga agkandidato isuna iti nangatngato a posisyon, a kas ti bise presidente, apaman kiddawen daitoy ni sigud a Presidente Rodrigo Roa Duterte.
Pagaammo ni Senador Robin Padilla kas maysa kadagiti nasinged a suportador ti sigud a presidente nga ita ket sumangsango idiay International Criminal Court mainaig ti crimes against humanity ti napalabas nga administrasyon na.
