Pinasingkedan ti liderato ti Department of Agriculture a puntiriada nga implementaren ti maximum suggested retail price dagiti imported rice.
Segun kenni Agriculture Secretary Francisco Tiu-Laurel Junior, ar-aramidendan ti kastoy a plano kas paset ti gandat ti gobierno a mangibaba iti retail price ti bagas ditoy pagilian.
Tarigagay ti ahensia a mapukaw ti P60 kada kilo a bagas kadagiti merkado gapu ta pammaneknek laeng daytoy iti kaadda ti ‘profiteering’.
Iti sidong ti maximum suggested retail price, maikeddeng no mano laeng ti rumbeng a maximum selling price ti imported rice kadagiti merkado.
Mainaig iti daytoy, kinumpirmaran pay ti sekretario a nakatuding ti panagtataripnong da kakadua dagiti DTI, BPI, ken BIR.
Plano met ti ahensia ti mangipaulog kadagiti pagannurotan para iti pannakaipatungpal ti maximum suggested retail price ita a bulan.
