Impaganetget ti House Prosecution Panel a saan a mabalin a kumontra wenno saan a tungpalen ni Davao City Mayor Sebastian “Baste” Duterte ti impaulog a subpoena kenkuana ti Senate impeachment court.
Daitoy ket manipud kenni House Private Prosecutor ken Legal Spokesman Attorney Benjamin Jay Tolosa kasaruno a dakamaten ni Impeachment Court Presiding Officer Chiz Escudero iti nagan ni Mayor Baste kadagiti napatulodan iti subpoena a sumango iti impeachment trial inton Setyembre 23.
Ti subpoena ket mainaig iti presentasyon ti prosekusyon seknan iti maikadua nga Article of Impeachment, a naglaon kadagiti alegasyon ti saan a mailawlawag a baknang ni Bise Presidente Sara Duterte.
Segun kenni Tolosa, obligado ni Mayor Baste a raemen ken tungpalen ti subpoena, bayat a ti impeachment court met iti agdesisyon nu mabalin isuna nga agserbi kas expert wenno hostile witness ti prosekusyon.
Manamnama a makiddaw kenkuana dagiti impormasyon mainaig iti GenCorp Industries ken dadduma pay a kompanya a nakalista kas business interests iti Statement of Assets, Liabilities and Net Worth (SALN) ni VP Sara.
Pagaammo a ni Mayor Baste iti makinkukua iti GenCorp ken dadduma pay a korporasyon, bayat a stockholder met iti kabsat na a Bise Presidente.
