BR LA UNION – Maysa a 79-anyos nga ama iti nakab-kabil agingga a natay babaen ti bukodna nga anak idiay Barangay Tabucbuc, Marcos, Ilocos Norte, segun kadagiti otoridad.
Binigbig ni Marcos Municipal Police Station Chief, P/Capt. Roi Manuel Ordonio, ti biktima a ni Pedro Tolentino Mateo, mannalon ken residente ti Sitio 6, Barangay Tabucbuc.
Nabigbig ti suspek a ni Joel Pasion Mateo, 44-anyos, mannalon ken residente ti nasao met laeng a barangay.
Naammuan iti inisyal nga imbestigasyon dagiti otoridad a nagsagaba ti biktima iti adu a sugat gapu iti pannakakabilna, a nakaigapuan ti ipapatayna.
Naitaray ti biktima idiay Doña Josefa Edralin Marcos District Hospital, ngem naideklara a dead on arrival babaen ti attending physician.
Kabayatanna, iti suspek ket adda itan iti kustodiya dagiti otoridad ken manamnama a maidatagan iti maiyannatop a kaso kriminal.
