BALAOAN, LA UNION – Adda itan ti ikonkonsidera kas person of interest ti Balaoan Police Station iti pammaltog a napasamak iti kawatiwatan ti national highway idiay Barangay Bungol, ili ti Balaoan idi parbangon ti Martes, Pebrero 24.
Positibo a nabigbig ti biktima ti nagan a Rheymar Soriano Ledda, 25-anyos, mannalon, ken residente ti Barangay Butubut Norte, iti isu metlaeng nga ili. Nakita ni Rheymar a nakaidda iti igid ti kalsada, addaan sugat ti ulo, nga kaabay ti agan-andar paylaeng a motor na.
Kinuna ni Police Major Dimsy A. Pitan, Chief of Police ti Balaoan Police Station a naawat da ti shooting report ti agarop 4:45 ti parbangon ken dagos a nagturong iti lugar. Mainaig iti dayta ket indeklara ti attending physician a nabiit pay a natay ti biktima ti agarop 4:30 ti parbangon.
Nupay awan iti asideg a CCTV footage a mabalin a makatulong ti kaso, innayon met ni Major Pitan nga agtultuloy iti imbestigasyon ken adda itan ti mabukbukel nga impormasyon a mangitudtudo ti maysa a person of interest.
Kabayatan ti panagproseso ti Scene of the Crime Operatives iti lugar ket nakarekobre da ti tallo a basyo ti kalibre .45 a paltog ken maibasar kadagiti sugat ti biktima, nakagun-od daitoy tama iti tumeng, tengnged, ken ulo.
Natakuatan pay ti maysa nga heat-sealed transparent plastic sachet a naglaon ti white crystalline substance a maatap kas shabu iti bulsa na isu nga ilegal a droga ti ikonkonsidera a motibo dagiti otoridad kadaitoy a kaso ti pammaltog. | via Bombo Rafael Galano
