LA UNION – Agtultuloy iti imbestigasyon ti pulisya maipapan iti panangitaray dagiti tallo a lallaki ti iggem a kwarta ken manmanehuen a kotse ti maysa a soap merchandiser idiay Barangay Patac, ili ti Sto. Tomas, La Union.
Nabigbig ti biktima a ni bMc Kelvin Parrocha, 24-anyos, residente ti Barangay Udiao, Rosario, La Union.
Iti pannakiuman ti Bombo Radyo kenni S/Ins. Juanito Buaron Jr., hepe ti Sto. Tomas Police Station, kinunana a kabayatan nga agmanmaneho iti kotse ken agawid koman idiay balyada ti biktima ket dinaanan ken binarsak dagiti tallo a lallaki iti itlog ti windshield ti nasao a lugan.
Gapu iti daytoy, nagsardeng nga agmaneho ni Parrocha kasaruno iti iyaasideg ken panangipaturong iti paltog kenkuana dagiti suspek.
Innala dagiti suspek ti P36,000 cash nga iggem ti biktima.
Intaray met dagiti suspek ti lugan a manmanehuen ni Parrocha kalpasan a pinababada daytoy.
Dagus a nagipulong kadagiti pulis ti biktima ken kalpasan iti sumagmamo nga oras a panangisayangkat iti pursuit operation ken narekobre ti nasao a kotse nga imbati dagiti suspek idiay Barangay Sta. Fe, ili ti Agoo, La Union.
Kinuna pay ti opisyal a base iti palawag ti biktima ken nakamotorsiklo, bin-ig a nakasuot iti agmaris nangisit a jacket ken nakabunete dagiti suspek na nangholdap. (Absalom Flores)
