Nakatuding a makaawat ti napalawa a benepisyo manipud Philippine Health Insurance Corp. (PhilHealth) dagiti middle-income contributors kas maiyannurot metten iti posisyon ni Presidente Ferdinand Marcos Jr. a masuportaran dagiti direct contributors.
Segun kenni Health Secretary Ted Herbosa, panggep ti baro nga inisyatiba a maipaayan ti napintas a benepisyo dagiti miembro nga agbaybayad kadagiti premiums da a direkta manipud iti sueldo wenno negosyo.
Napagpatangan da Sec. Herbosa ken ni Executive Secretary Ralph Recto iti panangikonsidera ti ahensiya ti upgrading kadagiti hospital accommodations.
Iti agdama ket amin a miembro ket maipapaayan ti basic accommodations isu a naisingasing iti dua a pasyente ti tunggal kuwarto, kasta met iti panangnayon ti air conditioning system.
Maysa pay a rekomendasyon ket iti panangpalawa ti PhilHealth packages kadagiti ospital a mangipatpatungpal ti zero-balance billing program.
Maad-adal pay nu kabaelan metlaeng a masustinir ti Philhealth daitoy, nupay nakasagana da met nga agbayad iti dakkel a kantidad kadagiti ospital ti agingga P300-B ken posible pay a maipangato dayta ita a tawen.
Impaganetget met ni PhilHealth spokesperson Dr. Israel Francis Pargas a dagiti benepisyo ket mabalin kadagiti amin a miembro, agraman dagiti awanan ti premium payments.
