Nasuspindir ti National Basketball Association (NBA) Milwaukee Bucks forward a ni Bobby Portis gapo iti panaglabsing na ti anti-drug policy iti liga.
Pinawilan ti NBA a makaay-ayam ni Portis iti agingga 25 games. Kayat na satwen, saanen a makaayayam pay ti 2021 NBA champion kadagiti nabatbati a paset ti 2024-2025 regular season.
Segun iti liga, nagpositibo ni Portis iti tramadol, maysa nga agas a maus-usar para iti severe pain wenno nakaro unay nga ut-ot ti bagi, nga saan met nga aprobado nga usaren dagiti basketball players.
Maibasar iti nagbalin a waragawag ti kampo ni Portis, nagbiddut laeng ti Bucks forward iti panaginom na ti tramadol.
Kinuna ni Mark Bartelstein, representante ni Portis, napagkamalian ti basketbolista a ti nainom na ket Toradol, maysa a pain medication nga aprubado ti NBA.
Ti nasao nga agas ket para kuma iti injury ni Portis iti siko na a nagun-od na metlaeng gapo iti panagay-ayam.
Iti sabali a bangir, nagdesisyon ti kampo ni Portis a saanen nga iyapelar pay ti nagbalin a desisyon ti liga.
Kabayatanna, gapo iti 25-game suspension, makissayan ti suweldo ti player ti agingga $2.85 million.
Maika-lima a pwesto ti agdama ranggo ti Bucks sadiay Eastern Conference, bitbit ti 29-24 win-loss record.
