LA UNION – Mangnamnama ti maysa a misis a maipaayan iti hustisya ti pannakatay ti asawana a pinaltugan iti riding in tandem idiay Barangay San Jose, ili ti Rosario, La Union.
Iti pannakiuman ti Bombo Radyo kenni Misis Lourdes Bangalit, asawa ti biktima a ni Benjamin, kinunana a daytoyen iti kalidayan a paset ti panagbiagna kalpasan a papatayen dagiti suspek ti mister ken naitumpong pay a napasamak daytoy iti Valentine’s day.
Awan met ti ammona a nakarikyar ti asawana ngem agsidsiddaaw daytoy no apay a napaltugan isuna.
Sigun iti misis, intulod ni Benjamin dagiti annnakda iti eskwelaan a naglubbon iti maysa a motorsiklo ken saanda na ninamnama a daytoyen iti kaudiyan a gundaway a makadduada a sibibiag ti padre de pamilya kalpasan a paltugan daytoy dagiti suspek.
Kabayatanna, ad-adalen met ita ti Rosario Police Station ti nai-record a video ti CCTV camera a pakabuyaan dagiti dua a maatap a lallaki a naka-helmet ken naglubbon iti maysa motorsiklo.
