LA UNION – Agtultuloy ti imbestigasyon ti pulisya maipapan iti pannakatakaw ti kwarta ti maysa a mister babaen kadagiti nagpammarang a timmulong kenkuana idiay syudad ti San Fernando, La Union.
Nabigbig ti biktima a ni Sotero Ramos III, 55, residente iti ili ti Bangar, La Union.
Base iti police report, nagturong iti maysa a bangko ti biktima kasaruno iti panangi-widraw na iti kwarta nga aggatad iti P40,000.
Idi a pimmanaw daytoy iti bangko, maipagarup a nakarikna iti panagulaw ti biktima ken napaarayat isuna iti maysa a traysikel drayber ken ti backrider daytoy nga iturong iti ospital.
Maipagarup a nagdisnudo ti backrider a gumatang iti agas ti biktima agingga a naawanan ti puot daytoy.
Ngem idi a nakariingen, nagbalawen ti nasao a mister gapu ta mapukpukawen ti kwartana ken dadduma pay nga alikamenna. (Absalom Flores)
