LA UNION – Agpapaagas ita idiay ospital ti mister a nasugatan kalpasan a paltugan daytoy ti maysa a lalaki idiay Barangay Poblacion, ili ti Santol, La Union itattay alas-4:00 ti parbangon.
Nabigbig ti 54-anyos a biktima a ni Felix Egipto, residente ti nasao a barangay.
Base iti inisyal nga imbestigasyon ti Santol Police Station, maipagarup a nakilubbon ti suspek a nabigbig iti nagan a Rolando Gagaoin iti motorsiklo ti biktima.
Kabayatan nga agmanmaneho ti biktima ket immasot iti paltog ti suspek kasaruno iti panagpaputok daytoy.
Napuntaan ti bagi ti biktima, kabayatan a naglibas met a dagus ti suspek kalpasan iti naaramid a krimen.
Naiturong met iti ospital ni Egipto tapno maipaagas ti sugatna.
Kabayatanna, naala met ti pulisya manipud ti crime scene iti dua a basyo ti cal .45 paltog.
Maysa kadagiti kitkitaen nga agnggulo dagiti otoridad ket ti personal a problema iti batetan dagiti dua. (Absalom Flores)
