LA UNION – Dead on arrival idiay ospital ti maysa a mister, kabayatan a nasugatan met ti anakna kalpasan a naidungpar ti naglugananda a wagon iti poste ti kuryente idiay kawatiwatan ti national highway idiay Barangay Cabaroan, ili ti Bacnotan, La Union itattay alas-2:50 ti parbangon.
Nabigbig ti pimmusay a ni Matemio Calpito, 56; kabayatan a naglak-am met iti sugat ti bagina iti putotna a ni Mateo Christopher Calpito, 15, residente ti Barangay Baroro ti nasao nga ili.
Iti pannakiuman ti Bombo Radyo kenni C/Ins. Reynaldo Soria, hepe ti Bacnotan Police Station, kinunana a maipagarup nga agap-apura nga agmanmaneho ti lugan ken kamkamaten ti mister ti maysa a bus tapno alaeng ti nabati a napateg a dokumento.
Idi a makagtengda iti nadakamat a lugar ket maipagarup a killaat a nagpreno ti mister ken naguyas ti luganna kasaruno iti pannakaidungpar iti poste ti kuryente.
Gapu iti kinapigsa ti pannakaidungpar, nakuppit iti makinsango a paset ti lugan.
Nagtitinnulong met dagiti kameng ti pulisya, Bureau of Fire Protection (BFP) ken Municipal Disaster Risk Reduction and Management Office nga arayaten dagiti agama a na-trap iti uneg ti lugan.
Kabayatanna, natalged metten ti kasasaad ti ub-ubing a Calpito. (Absalom Flores)
