Agtultuloy iti nabara a paniempo ditoy Pilipinas agingga ita a lawas ti bulan ti Marso.
Segun iti state weather bureau, gapo daitoy iti easterlies wenno angin a naggapo iti daya.
Nu adda man dagiti mapadasan a panagtudo, apagbiit ken mapatto-pattok laeng agsipud ta awan met iti mabanbantayan a low pressure area (LPA) ditoy uneg ti Philippine Area of Responsibility.
Nagpakdaar met ti ahensya a liklikan ti napaot a panagtalinaed iti ruar, nangruna kadagiti oras a nakaro iti silnag ti innit, gapo metten iti agtultuloy a panagngato ti heat index kadagiti napalabas a lawas.
