Nakabalod ita ti maysa a 35-anyos nga baro kalpasan na nga uramen ti balayda idiay Barangay Cabaruan iti ili ti Sto. Tomas, La Union.
Nabigbig ti suspek a ni Rogie Laroco.
Naamuan ti Bombo Radyo manipud iti Sto. Tomas Police Station, nagawid a nabartek ti suspek idi sinindyan na ti balayda a naaramid iti light materials.
Awan ti naaramidan ti ina na a ni Margie Laroco tapno atipaen ti nabartek nga anak agingga a naan-anay a dimmapo ti balay ken awan ti naisalbar nga alikamen.
Impaarestar met ti misis ti anak na kadagiti pulis ken pampanunoten na no ituloy iti panangidatag ti kaso.
Agtultuloy pay iti panangisayangkat ti assesment dagiti miembro ti Bureau of Fire Protection tapno maamuan iti kabuklan a gatad ti nauram a sanikua.
