LA UNION – Naideklara a dead-on-arrival iti Ilocos Training and Regional Medical Center (ITRMC) iti siudad ti San Fernando ti maysa a 56-anyos a mister kalpasan a binagsol ti nakainomanna a 21-anyos idi rabii.
Ti biktima ket nabigbig a ni Bernardo Gatchalian Sr. addaan iti asawa, bayat a ti suspek ket ni Bern Gatchalian, agpada a residente ti Barangay Alaska, Aringay, La Union.
Maibasar iti nakalap nga impormasion ti Bombo Radyo La Union, nagiinom dagiti dua kaduada ti maysa pay a nasugatan a ni Oliver Quindara, bayat a padpadaananda ti isasangbay ti baro a tawen ngem timpuar ti panagsinnupiat iti nagbaetan da Oliver ken Bern.
Gindanat ti biktima nga anawaen dagiti dua ngem daytoy met ti binagsol ti suspek babaen ti kutsilio ken nabuong a botelia, a nagbanag iti pannakatayna.
Adda itan iti kustodia ti Aringay Police Station ni Bern bayat nga agtultuloy a maim-imbestigaran.
