LA UNION – Dinillaw ni sigud nga Usec. Henry Bacurnay ti nasiputanna a nagkurangan iti Bauang Fire Station iti panagresponde dagitoy kabayatan a maur-uram ti dati a nagpaay a headquarter-na ti panawen ti eleksyon a naaramid iti light materials idiay Barangay Calumbaya, ili ti Bauang, La Union.
Iti pannakiuman ti Bombo Radyo kenni Bacurnay, kinuna a dagiti bumbero manipud iti San Fernando City Fire Station iti nanglippas a nagsebseb iti maur-uram a sanikua daytoy.
Sigun ti sigud ng opisyal, bassit koma iti napirdi nga alikamenna no saan a kurang iti tauhan ti Bauang Fire Station ken addaan ti umdas a suplay iti danum ti fire truck dagitoy.
Awatenna lattan kinunana ti nagbalin a tignay ti Bauang Fire Station.
Kabayatanna, dimmipensa met ti Bauang Fire Station maipapan iti nasao a waragawag ni sigud nga Usec. Bacurnay.
Sigun kenni FO3 Andrew Tacata, OIC Municipal Firemarshal, kontroladodan ti uram sakbay a simmangpet kadagiti kameng ti San Fernando City Fire Station tapno tumulong.
Inlawlawag ti opisyal a naawatda ti report a maur-uram iti sanikua ni Bacurnay babaen kenni Michael Angelo Buenavides a residente ti nasao a barangay agarup ala-1:55 ti parbangon idi December 25, 2017.
Nakamotorsiklo a naggapu ni Buenavides idi a nag-report daytoy iti fire station.
Dagus met a nagtignay dagiti bumbero a nagresponde iti maur-uram a pasdek a kukua ti sigud ng opisyal.
Kinuna pay ni Tacata, a napigsa unayen iti apoy idi a makasangpetda iti lugar ken narigatan a sumrek ti fire truck gapu iti kinailet ti kalsada.
Nagkiddaw met a dagus iti tulong ti opisyal iti San Fernando City Fire Station.
Impaganetget ni Tacata a napunno iti danum ti fire truck da ken isuda iti nakasebseb iti uram apaman a nakasangep ti augmentation manipud iti San Fernando City Fire Station.
Aminado isuna a naibusan iti danum ti fire truck ngem nag-reffill dagitoy babaen ti danum nga insangpet iti fire truck a naggapu iti syudad kasaruno iti panangisayangkat iti overhauling operation.
