Saan nga impagarop ti misis ti napapatay a drug personality nga agpakpakadan daytoy babaen iti panang-ungngo na iti anakda sumagmamano nga oras sakbay daytoy a pinalpaltogan ti riding in tandem idiay Barangay Dalumpinas Oeste, ciudad ti San Fernando, La Union.
Iti eklusibo nga interview ti Bombo Radyo kenni Marites asawa ti pimmusay a biktima a ni Norlito Apilado, sakbay iti napasamak a pammaltog ket intulod na pay dagiti ag-ina idiay Barangay Cabaroan ken inungwa-ungwan na ti ma-ika pito nga anak da a dua a bulan.
Inallukoy met ti misis dagiti suspek a sumukon ken makonsensya iti inaramid a panangpatay iti asawa na.
Malidayan met daytoy para kadagiti anak nangruna iti dua a bulan nga anakda gaputa awanen ti maimatangan na nga ama.
Inulila met ti biktima ti asawa na ken pito a anak nga edad 16, 15, 13, 7, 5 ken ti dua nga bulan a maladaga.
