(Update) LA UNION – Agkidkiddaw iti dispensar manipud kadagiti naulila a pamilya ken survivors ti driver iti truck a karaman iti napasamak nga aksidente a nakatayan iti tallo a nakalugan iti ambulansya idiay ili ti San Juan, La Union.
Iti pannakiuman ti Bombo Radyo iti nasao a tsuper ti truck a ni Sebastian Torretio, kinunana a saan a naigagara ti trahedya ken mangnamnama isuna iti pammakawan manipud iti pamilya dagiti biktima.
Sigun kennni Torretio, ginandatna met nga inliklik iti panagdinnungpar ngem napaay daytoy gapu ta napartak iti panagpataray ti kasainnabat nga ambulansya.
3 natay, 3 nasugatan iti panagdinngupar ti ambulansya ken truck
Kabayatanna, kinuna ni Major Bernabe Oribillo, hepe ti San Juan Police, agparparang iti panagsukimat dagitoy a maipagarup a napartak iti taray ti ambulansya ken posible a nakaridep iti driver daytoy isu a naibaw-ing ti direksyonna kasaruno iti pannakidinnungpar iti truck.
Kinumpirma met ni Orobillo nga agtultuloy pay laeng a maob-obserbahan dagiti tallo a survirors a naglugan iti ambulansya idiay ospital.
Sakbay ti aksidente ket maipagarup a naggapu manipud iti maysa nga ospital idiay Batac, Ilocos Norte ken agturong koma idiay syudad ti Valenzuela ti nasao nga ambulansya tapno mangitulod iti maysa a pasyente.
