LA UNION – Nawaya-wayaan ni sigud a Negros Oriental Rep. Arnie Teves manipud house arrest na idiay Timor Leste, maibasar iti kumpirmasyon ti abogado na a ni Atty Ferdinand Topacio.
Iti maysa nga statement, kinumpirma ni Atty. Topacio iti report nga impablaak ti media idiay Timor Leste, nga immandar ti tribunal a mangisay-sayangkat ti extradition proceedings ni Teves a waya-wayaan ti sigud a mammanday linteg manipud pannaka-house arrest.
Ngem adda dagiti naipataw a kondisyon iti pannakawaya-waya ni Teves, a pakaibilangan iti regular a panag-reportna iti court officer ken commitment na a saan a pumanaw idiay East Timor bayat a nakapenpen pay laeng iti extradition case.
Kayatna sawen, naisubli iti naan-anay a waya kenni Teves maiyannurot iti bilin ti pagukuman idiay Timor Leste, a nangwaswas iti preventing detention order gapu kadagiti nakita a depekto iti kadawatan ti gobyerno ti Pilipinas para iti extradition ti expelled congressman.
Maipalagip a nagramot dagiti panagdengneg ti Court of Appelas idiay Timor Leste iti extradition case ni Teves idi kiniddaw ti gobyerno ti Pilipinas nga i-extradite ni Teves agsubli ditoy pagilian, tapno sangwen dagiti kaso na a pammapatay kalpasan naakusaran nga utek wenno mastermind iti pammapatay kenni Negros Oriental Gov. Roel Degamo ken dadduma pay idiay Pamplona idi Marso 4, 2023.
