BR LA UNION – Kinumpirma ni Department of Justice Secretary Jesus Crispin ‘Boying’ Remulla nga umabot iti nasurok 200 a tattao iti maipagarop a karaman iti anomalya dagiti flood control projects ti gobyerno.
Kinuna na nga adun dagiti maim-imbestigaran seknan iti nalawa nga isyu ti korapsyon ken panag-kunniber iti pondo ti gobyerno manipud kadagiti ‘infrastructure projects’.
Imbinglay ti sekretaryo nga iti agdama, agtultuloy ti isay-sayangkat da a ‘case buildup’ kontra kadagiti mairam-raman iti anomalya.
Dagiti posible kunana a maidatag a kaso ket graft, malversation of public funds ken indirect bribery.
Innayon pay ni Justice Secretary Remulla, iti bilang a 200 ket posible a manayunan pay.
Nainget nga ad-adalen ti departamento iti umno a kaso a maidatag kontra kadagiti opisyal ken indibidwal a karaman iti kontrobersiya.
Segun kenni Sec. Remulla, ti naisang-sangayan kadagiti karaman nga opisyal iti flood control projects anomaly ket maaw-awagan a ‘cong-tractors’.
Naglaok a ‘congressman’ ken ‘contractor’ nga adda iti likod dagiti maipagarop a korapsyon kadagiti proyekto ti gobyerno.
Mabalin a dagiti sigud a contractor ket nagbalin a kongresista, banag a mailabsing iti konstitusyon.
Malaksid a saan a maiyannurot iti linteg, impaganetget pay ni Remulla a daytoy ti maibilang a ‘conflict of interest’.
Imbaga pay ni Justice Secretary Remulla nga adda iti 67 nga indibidwal iti nadetermina a ‘congtractors’ ken maim-imbestigaran.
Manipud daytoy iti nasurok 200 a tattao a maim-imbestigaran a buklen dagiti district engineers, contractors, kongresista wenno ‘congtractors’.
