Manmano ti manamnama a tumama a bagyo iti pagilian bayat ti “very strong” El Niño, ngem segun ti Philippine Atmospheric, Geophysical and Astronomical Services Administration (PAGASA), posible a makadadael unay dagiti mabukel a bagyo.
Segun kenni Ana Liza Solmoro-Solis, hepe ti Climate Monitoring and Prediction Section (CLIMPS) ti Climatology and Agrometeorology Division (CAD) ti PAGASA, nupay bumassit iti bilang dagiti bagyo tunggal adda nakaro nga El Niño, ngumato iti posibilidad a napigpigsa ken napeggad dagitoy.
Iti agdama, awan pay ti agraraira nga El Niño iti pagilian, ngem namnamaen ti PAGASA a mabalin a mapasaran ti “very strong” El Niño iti maudi a kuarter ti 2026.
Ti El Niño ket maysa a natural phenomenon a pakaigapuan iti panagbara ti temperatura iti Pacific Ocean, a dakkel ti epektona iti klima ti Pilipinas. Masansan nga agresulta daytoy ti napapaut a tikag, basbassit a tudo, ken panagbalbaliw iti pattern ti panagporma ti bagyo.
Gapu iti daytoy, impalagip ti PAGASA iti publiko ken lokal a gobierno ti panagsagana iti posible nga epekto dagiti napigpigsa a bagyo, nangruna kadagiti lugar a masansan a tamaan dagiti kalamidad.###
