Inwaragawag ti Department of Justice a kasapulan pay a maipasidong iti panagamiris wenno forensic examination iti narekobre a sako a naglaon ti maipagarop a rurog ti tao.
Daytoy ket kasaruno ti naisayangkat nga initial technical site assessment idiay Taal Lake ti departamento kabinnulig iti Philippine National Police ken Philippine Coast Guard.
Segun iti DOJ, maitunos daitoy iti sumaruno nga addang a sursuruten da nga iti umuna ket iti pormal a sertipikasyon a mangibagbaga a pudno a tulang wenno rurog ti tao iti narekobreda.
Iti nasao a sertipikasyon ket agtaud iti Philippine National Police Cybercrime Investigation and Detection Group wenno iti National Bureau of Investigation.
Malaksid iti panagamaris ket kasapulan met a mangisayangkat ti DNA testing tapno maamwan no adda ti koneksion wenno agmatch daytoy iti maysa kadagiti kabagyan dagiti mapukpukaw a sabungero.
Mainaig iti daytoy ket inwaragawag ti National Bureau of Investigation a nakasaganada a mangipaay ti tulong iti maisayangkat nga examination.
Maipalagip nga iti panangisayangkat ti technical site assessment wenno diving operation iti paset ti Taal lake ket kasaruno iti imbutaktak ti maysa a testigo. #
