Nangipatulod ti National Aeronautics and Space Administration (NASA) iti spacecraft agturong iti maysa kadagiti bulan ti planet Jupiter.
Naipatayab ti Europa Clipper spacecraft tapno maadal ti bulan a Europa. Naisakay daitoy iti SpaceX Falcon Heavy rocket ken naipatayab sadiay Kennedy Space Center, Florida.
Idi pay koma Oktubre 10 a naaramid ti panangipatayab ngem natantan gapo iti Hurricane Milton. Kalpasan ti maysa oras ken 10 a minutos, nakaawat ti NASA ti signal manipud ti Europa a nakastreken daitoy iti obit ti lubong.
Agserbi ti Europa Clipper kas kaunaan nga spacecraft ti NASA a nakatukon para iti panagadal ti ice-covered ocean world iti solar system. Maadal met iti posibilidad a nu mamagbalin ket agnaed ti tao iti daitoy a bulan ti Jupiter, agsipud ta adda met laeng iti danom na.
Addaan ti spacecraft ti siyam nga instrumento ken gravity experiments tapno imbestigaran iti baybay ti baetan ti napuskol a yelo ti Europa. Ti danom ti nadakamat a bulan ket mamindua a daras nga ad-adu ngem iti kabaybayan ti Earth.
Kabayatanna, $5.2 bilyon ti inisyal a gatad daitoy idi naaramid, tawen 2013. Agbiyahe ti spacecraft iti 1.8 bilyon a milya ken manmanama a makasangpet sadiay Jupiter, Abril iti tawen 2030.
