LA UNION – Adda pay iti pakabuklan a 1,024 displaced workers iti nailista ti Dept. of Labor and Employment (DOLE)-Region One iti laksid nga in-inuten nga agsub-subli iti ganaygay ti empleyo ditoy lokalidad kalpasan a maapektaran ti pandemya iti trabaho dagiti kaadwan.
Segun daytoy kenni Region One Labor Communication Officer Justin Paul Marbella, base iti datos ti DOLE Region 1 as of August 2021.
Dagiti nasao a displaced workers ket pakairaman dagiti na-retrench, temporaryo a nagsarado ti establisimento a pagtrabtrabahuan ken dagiti nakaipasidong iti flexible work arrangement.
Nakailista met ti ahensiya iti 97 nga establishimento a naapektaran iti retrenchment, temporary closure ken flexible work arrangement.
Kinuna ni Marbella, naipaayan metten dagitoy a mangmangged iti cash assistance babaen iti Dole Camp ken dadduma pay nga interventions ti ahensiya, a kas iti TUPAD program wenno Tulong Panghanapbuhay Para sa Ating Displaced/Disadvantaged Workers.
Mangnamnama iti DOLE Region 1 a sumayaat pay iti estado ti empleyo kabayatan iti in-inut a panaglukat ti ekonomiya ditoy lokalidad.
