LA UNION – Dinupudop iti nasurok a 1,000 a tattao ti programa ti Police Regional Office-1 (PRO-1) a maaw-awagan ti “Police be careful with your heart” kagiddan iti pananglagip ti Aldaw dagiti Puso idiay syudad ti San Fernando, La Union.
Alas-5:30 itattay parbangon a narugyan ti programa manipud iti grandstand ti PRO-1 babaen ti zumba, panagbisekleta ken pannagna agingga idiay San Fernando City plaza.
Iti panakiuman ti Bombo Radyo kenni Supt. Janet Homo, chief ti Regional Health Services ti PRO-1, kinunana a panggep ti programa nga ipalagip kadagiti pulis ken uray pay kadagiti umili ti kinapateg iti panangsalwad ti salun-at iti puso.
Nangisayangkatda met iti seminar wenno lecture nga addaan ti pakainaigan iti panangsalwad ti puso ken panangipaay ti dadduma a health services nga agpaut agingga inton Febuary 28.
Sigun met kenni Supt. Ferdinand de Asis, spokesperson ti PRO-1, malaksid iti aggigiddan a panagrambak ti Valentine’s Day ket panggep met ti nasao a programa nga indaulwan ni Regional Director C/Supt. Rumulo Sapitula a pagkaykayasaen iti pulisya ken umili kontra ti droga, kriminalidad ken kurapsyon.
