Dumanon ti nasurok-kumurang 130,000 dagiti indibidual a dimmar-ay iti umuna nga aldaw ti peace rally nga inorganisa ti Iglesia ni Cristo, kas maibasar iti impormasion nga inruar ti Manila City Disaster Risk Reduction and Management Office manipud ti Manila Police District.
Ti nasao a rally ket addaan panggep nga ipanawagan iti transparency ken nasayaat a panangimaton iti kangitingitan dagiti naibutaktak a korapsion kadagiti flood control projects.
Maisayangkat iti rally iti las-ud ti tallo nga aldaw manipud Nobiembre 16 agingga Nobiembre 18 idiay Quirino Grandstand, Rizal Park, Manila.
Nangiwaras iti Philippine National Police (PNP) ti nasurok 16,000 a personnel iti venue tapno masigurado iti kinatalged dagiti nakipaset.
Impasdek met ti Manila City Government dagiti emergency medical stations, portable toilets, ken dadduma pay a napapateg a suporta tapno masigurado iti kinatalged ken pagsayaatan dagiti amin a dimmar-ay.
Segun kenni PNP spokesperson Police Brigadier General Randulf Tuaño, ti nasao a panagtitipon ket maysa a “religious rally” ken saan a “political rally”.
Kabayatanna, nangisayangkat met iti rally ti United People’s Initiative Fighting Corruption a grupo dagiti retirado a heneral.
Kenuna ni UPI Secretary General Capt. Rey Valeros nga iti programa nga insayangkat da idiay Edsa People Power Monument ket saan a panangipakita ti panangkontra iti gobierno, no di ket maysa a panawagan kadagiti opisial ti gobierno a pagsungbaten dagiti agar-aramid ti panagkunniber ken korapsion.
