BR LA UNION – Immakar iti nataltalged a lugar iti nasurok 200 a pamilya idiay Itogon, Benguet kalpasan iti nagsasaruno a panag-regga-ay ti daga manipud iti paset dagiti bantay, gapwanan ti awan sarday a panagtudtudo.
Manipud idiay Sitio Goldfield, Barangay Poblacion, naapektaran iti 15 a pamilya kalpasan a narga-ay ti dakkel a paset ti bantay.
Segun kenni Barangay Captain Flordeliza Depayso, agtultuloy iti isay-sayangkat da nga assessment ken monitoring isunga posible a manayunan pay ti bilang dagiti apektado.
Maysa pay a pagtaengan iti nagaburan ti narga-ay a daga, ngem awan ti naipadamag a nasaktan gaputa naka-akar dagiti residente sakbay a napasamak ti insidente.
Segun kenni Depayso, posible nga agpaut ti maysa a bulan iti pannaka-lukat ti nagaburan a kalsada gaputi kaadu ti narga-ay a daga.
Kabayatanna, segun kenni Engr. Cyril Batcagan, head ti Municipal Disaster Risk Reduction and Management Office (MDRRMO)–Itogon, kit-kitaen da iti posibilidad dagiti alternatibo a dalan.
Ngem aminado nga awan pay ti mairekomenda da a ruta iti agdama, agsipudta uray ti dadduma a kalsada iti ili ket apektado iti panagregga-ay ti daga ken bato.
Innayon pay ni Engr. Batcagan, duk-duktalen da nu adda pakainaigan iti panagminas iti napasamak nga slide, nupay iti agdama ket maipagarop nga awan iti operasyon ti panagminas iti nasao a paset ti barangay nga apektado.
Idiay Camp 3, Acupan, Virac, Itogon aganay 213 a pamilya wenno kaibatugan ti 866 nga indibidwal ti naiyakar kalpasan a madadael iti 15 a babbalay gaputi agtultuloy a panagregga-ay ti daga.
Mainaig ti dayoy, siniguro dagiti maseknan nga ahensiya nga agtultuloy ti panangipaay ti tulong kadagiti apektado a pamilya kas ti taraon, temporaryo a pagdagusan ken dadduma pay a kasapolan.
Kiniddaw pay ni Engr. Batcagan kadagiti minero a temporaryo pay laeng nga isardeng iti anyaman nga aktibidad ti panagminas bayat a saan pay a nagsardeng iti panagtudtudo gapwanan ti dakes a panawen.
Impalagip na kadagiti residente, nangruna kadagiti agnanaed iti landslide-prone area, a dobliyen ti panagannad ken dagus nga umakar nu kasapolan tapno maliklikan ti anyaman a trahedya.
