BR LA UNION – Agarup 283 a mammanday-linteg ti nangiyebkas iti suportada kenni Speaker Martin Romualdez tapno agtultuloy ti panangidaulona iti maika-20 a Kongreso.
Daytoy ti impadamag ni Manila Representative Ernesto Dionisio Jr.
Inladawan met ni Lanao del Sur Rep. Zia Alonto Adiong ti nasao a suporta kas “overwhelming.”
Mayorya iti nangipeksa ti suporta para iti agtultuloy a panangidaulo ni Speaker Romualdez.
Impaganetget dagiti miyembro ti Kamara nga agtalinaed a personal ken boluntaryo a desisyon ti speakership vote.
Inaramid dagiti mammanday-linteg ti panangilawlawag kalpasan a nakitaripnong ti Speaker kadagiti neophytes ken agsubsubli a miyembro ti Kamara iti maysa a fellowship dinner itay nabiit.
Kinunada nga awan ti apela ni Speaker Romualdez a suporta iti nadakamat a fellowship dinner.
Kinuna dagiti dua a kongresista a ti pangrabii ket maysa laeng a tignay a mangabrasa ken mangparegta kadagiti baro ken agsubsubli a miyembro ti Kamara.
Imbaga ni Adiong a nangipaay laeng ti guidance ni Speaker Romualdez kadagiti baro a miyembro ti Kamara nu kasatnu da nga agbalin nga epektibo a lider iti bukod da a distrito.
