Inyanunsyo ti Philippine Drug Enforcement Agency (PDEA) a drug-cleared itan ti pakabuklan a 29,390 manipud iti 42,002 a barangay ti intero a Pilipinas.
Dagiti drug-cleared barangays ket sigud nga apektado ti ilegal a droga a naipasidong iti Barangay Drug Clearing program ken naideklara kas ‘cleared’ manipud iti panagsaknap iti maiparit nga agas.
Manipud iti inbinglay nga accomplishment report ti ahensiya, kinuna ni PDEA Director General Isagani Nerez a dumanonen ti pakabuklan a 320 a lugar ditoy pagilian ti maibilang kas “unaffected” wenno dagiti barangay nga awanan kadagiti indibidwal a drug user, drug pusher, drug den maintainers, ken dadduma pay nga illegal drug activities.
Impadamag pay ti PDEA nga agingga 6,179 a barangay ti naideklara kas drug free – kayat a satwen, lugar a saan nga apektado kas pinasingkedan ti Oversight Committee on Barangay Drug Clearing.
Nupay kasta, adda latta met dagiti 6,113 a barangay ti maibilbilang nga apektado ti peste a droga nu sadino ket Metro Manila latta iti mangidadulo iti listaan.
Nakatutok met iti PDEA kadagiti pagturturongan ken imbakan dagiti illegal drugs nangruna kadagiti lugar ti Central Luzon, Calabarzon, Central Visayas, Zamboanga Peninsula, ken Bangsamoro Autonomous Region in Muslim Mindanao.
Segun iti ahensya, sumagmamano kadagiti kadakkelan a drug hauls ti gobierno iti umuna a paset ti 2025 ket ti naharang a 404.95 kilos ti shabu sadiay Port of Manila idi Enero 23.
