LA UNION – Apektado iti pakabuklan a 309,518 indibidwal wenno kaibatugan ti 85,415 pamilya iti sumagmamano a rehiyon iti Luzon gaputi panagduprak ti naglabas a bagyo Nika ken iti agraraira pay laeng a bagyo Ofel.
Maibasar iti datos ti National Disaster Risk Reduction and Management Council (NDRRMC) a nairuar idi kalman, Huwebes, dagiti apektado a pamilya ket manipud Ilocos region, Cagayan valley, Central Luzon, Bicol ken Cordillera Administrative region.
Adda nasurok 26,000 nga indibidwal ti agtaltalinaed kadagiti evacuation center bayat a nasurok 19,000 nga indibidwal iti temporary a nagdagus iti dadduma a lugar.
Iti agdama, dua ti naipadamag a nasugatan idiay Central Luzon iti tengnga ti panagduprak ti 2 kadagiti nagsasaruno a bagyo a timmama ditoy pagilian ita a Nobiyembre.
Kabayatanna, impadamag ti ahensiya a dumanon iti pakabuklan a P320,658,974 iti balor ti nadadael iti sektor ti imprastruktura idiay Central Luzon.
Adda met ti nasurok 2,000 a babbalay ti nadadael, kaadwan ket nailista idiay Cagayan Valley.
Pakabuklan a 153 road sections ken 91 a rangtay iti naapektaran gapu kadagiti panaglayos.
Agtultuloy ti panagibunong ti tulong kadagiti apektado ti kalamidad nga umaboten iti nasurok P10.646 million a balor ti relief assistance.
Kabayatanna, target ti Office of Civil Defense a zero casualty iti panagduprak ti bagyo Ofel ken iti simrek a bagyo idi rabii a maawagan ti bagyo pepito, segun kenni OCD Administrator Arnel Nepomuceno.
