Dumanon ti nasurok 31,000 manipud kadagiti 115,791 a balud ti nakatuding nga agbotos para ti umay nga eleksyon inton Mayo 12.
Segun kenni Bureau of Jail Management and Penology spokesman Superintendent Jayrex Joseph Bustinera, aganay 31,251 a balud ti agbotos 393 kadagiti special polling centers iti uneg ti pagbaludan.
Dagiti nabatbati a 464 nga Persons Deprived of Liberty (PDLs) escort-an dagiti jail officers kabayatan ti panagbotos da kadagiti polling precinct nu sadiay isuda ket nakarehistro.
Impadamag pay ti opisyal nga adda pito a PDLs ti agkankandidato: dagitoy ket tumartaray a kas Senador, alkalde, ken kongresista bayat a dagiti dua met ket agkankandidato iti kina-bise alkalde ken ti nabatbati pay a dua ket kas municipal councilor.
Immuna metten a kinuna ni Bustinera a palaplubosan iti paglintegan ti Pilipinas a makabotos dagiti rehistrado nga botante a balud a madama paylaeng ti panagdengngeg ti kaso da ken saan pay a naresolbar iti korte.
Mainayon pay kadakuada ket dagiti nakasoan ken agur-uray ti panagdengngeg kasta met dagiti indibidwal a nakabalud kadagiti sentensiya a nababbaba ngem uppat a tawen.
