Impadamag ti Department of Health (DOH) nga immadu ti bilang dagiti nagbakwit idiay Kanlaon a nakapadas iti respiratory infection manipud idi imbilin ti gobierno ti mass evacuation.
Segun iti DOH – Negros Island Region, 74 nga evacuees ti nakaptan iti nagduduma a respiratory infections sipud idi naisayangkat ti forced evacuation.
Agdagup iti 71 a tattao ti addaan met iti dadduma pay a sabali nga sakit.
Segun iti DOH, agdagup iti 77 a medical personnel ti naideploy kadagiti 32 nga evacuation centers kadagiti naapektaran a lugar.
Natakuatan dagiti medical personnel ti nangato a bilang dagiti masakit bayat ti regular a panag-check-up ken nasaknap a health surveillance da.
Kangrunaan a binantayan da dagiti evacuation centers sadiay La Castellana, Bago City, La Carlota City, ken San Carlos City idiay Negros Occidental ken Canlaon idiay Negros Oriental.
Impasiguro ti DOH ti agtultuloy a pannakairuar dagiti agas ken dadduma pay a medical supplies kadagiti evacuation centers tapno usaren dagiti masakit nga evacuees.
Segun iti DOH, nakaiwarasen ti ahensya iti agdagup 135,329 nga assorted medicines, 87,200 N15 masks, 48,500 face masks, 17,000 aquatabs, 349 nebulizer kits, rinibu a surgical gloves, ken goggles, sipud iti panagbettak manen ti bulkan idi umuna a paset ti Disiembre.
