BR LA UNION – Impaganetget ni National Bureau of Investigation (NBI) Director Melvin Matibag a “consummated” iti betrayal of public trust ni Vice President Sara Duterte kalpasan nga inwaragawag na iti publiko nga adda kinasarita na a mangpatay kada Presidente Ferdinand Marcos Jr., First Lady Liza Araneta-Marcos, ken sigud a House Speaker Martin Romualdez nu adda dakes a mapasamak kenkuana.
Iti maikasiyam nga aldaw ti impeachment trial ni VP Sara, imbaga ni Matibag a ti mismo a waragawag ti Bise Presidente ket maibilang a panangaklon a nakikoordinar isuna iti maysa a tao a mangaramid ti pammapatay.
“The betrayal of public trust was already been consummated when she publicly admitted… there is already an admission that she contracted a killer, mamamatay-tao or assassin to kill the President,” ani Matibag.
Inlawlawag pay ti NBI chief a maipagarop a maikontra daytoy iti sinapataan a pagrebbengan ti maysa nga elected official a sumurot iti linteg ken mangipaay ti hustisiya iti amin.
Nagramot ti isyu iti maysa a viral a video ti virtual press conference ni Duterte idi napan a tawen idi imbaga na nga addan kinasarita na a tao ken binilin na a mangpatay kada Marcos Jr., Araneta-Marcos, ken Romualdez ingkaso nga isuna ket mapatay. Impaganetget pay ni Duterte iti dayta a gundaway a “no joke” ti nagbalin a waragawag na.
Iti panagdengngeg idi Miyerkules, kiniddaw ti kampo ti depensa nga ikkaten iti record ti waragawag ni Matibag seknan iti maipagarop a betrayal of public trust.
Nupay kasta, saan daytoy a pinatgan ti impeachment court.
