BR LA UNION – Direkta nga inawagan ni House prosecution counsel ni Atty. Lorna Kapunan a maysa nga “scam” iti pananggastos ti Office of the Vice President (OVP) ken ti Department of Education (DepEd) iti minilyon a confidential funds iti agtultuloy nga impeachment trial ni Bise Presidente Sara Duterte idi kalman, Martes, Agosto 4.
Iti nasao a panagusig, sinalodsod ni Atty. Kapunan iti testigo ken sigud nga auditor ti Commission on Audit (COA) a ni Roderick Wamil.
Maibasar iti COA circular, nu iti pampubliko a pondo ket saan a maipalawag wenno awanan ti naan-anay a dokumento, adda atap wenno presumption a daytoy ket nausar iti personal a pagimbagan ti opisyal (prima facie evidence).
Idi kumpirmaren ti testigo a maitunos iti sitwasyon, inyebkas ni Kapunan iti maudi a komento na sakbay a leppasen ti panagsalodsod : ket kinunana ti kastoy ….“Nu siak ti salodsoden, scam daytoy.”
Dagus a pimmalag ken nag-object ni Atty. Michael Poa, iti abogado ken tagapagsarita ti depensa.
Inlaban ni Atty. Poa a ti waragawag ti prosecution counsel ket out of order.
Pinaboran met ni Senate Impeachment Presiding Officer Francis “Chiz” Escudero iti panangsupyat ti depensa.
Immandar ni Escudero nga i-strike off the record wenno ikkaten iti opisyal a listaan iti impeachment court ti nagbalin a komento ni Kapunan.
Kabayatanna, linapdan pay ni Private Prosecutor Atty. Lorna Kapunan ni sigud nga COA auditor Roderick Wamil a sungbatan ti salodsod ni Defense Counsel Atty. Michael Poa seknan nu adda napaneknekan nga uray maysa a kusing manipud confidential funds ti napan iti bulsa ti Bise Presidente.
