BR LA UNION – Nangiruar ti National Bureau of Investigation (NBI) ti baro a dash cam footage a mapapati a naglaun iti maudi a gundaway ni sigud a Department of Public Works and Highways (DPWH) Undersecretary Catalina Cabral.
Ti nasao a footage ket addaan ti marka a December 18, 2025, aldaw a pannakatay ti sigud nga opisyal.
Naala daytoy iti baetan ti alas-3:25 agingga alas-3:26 ti malem.
Makita iti baro a footage ti maysa a babae a nakatugaw iti igid ti kalsada, iti baetan dagiti concrete barrier a direkta a nakasango iti nauneg a rangkis .
Iti timestamp a 15:25:37 ti footage, makita ti nakatugaw a babae ti igid ti kalsada a mapapati a ni Cabral ken agpada iti suot na iti naudi a kawes ti sigud nga opisyal.
Immuna a nangiruar dagiti otoridad ti CCTV footage idiay Ion Hotel a temporaryo a nagdagusan da Cabral ken ti driver na iti nasao met laeng nga aldaw.
Iti nasao a video, makita a pimmanaw dagiti dua iti room, pasado alas-2 ti malem.
Nu subliyanan ti immuna a salaysay ti driver ni Cabral a ni Ricardo Muñoz Hernandez, agarop alas-2 agingga alas-3 ti malem nga imbati na ti sigud nga opisyal idiay Kennon Road, Sitio Maramal, Camp 5, Barangay Camp 4, Tuba, Benguet.
Kinuna na a napasamak daytoy kalpasan a naggapo da idiay Ion Hotel idiay Baguio City.
