LA UNION – Agsag-saganan iti National Commission of Senior Citizens (NCSC) nga ipatungpal ti Republic Act 10868 wenno Centenarians Act of 2016.
Mangrugi inton January 2025 ket iggamanen ti komisyon iti implementasyon ti Centenarians Law, iti linteg a mangipaay ti umiso a benepisyo kadagiti nataengan.
Malaksid iti da-an a Centenarians Law, idaulwan pay ti komisyon iti panangipatungpal ti Republic Act 11982 wenno Expanded Centenarians Law.
Iti sidong ti 2016 Centenarians Law, maipaayan dagiti senior ti agingga P100,000 cash nu madanon ti edad a 100.
Iti met sidong ti Expanded Centenarians Law, maipaayan ti P10,000 cash dagiti senior nga umabot iti edad nga 80; ken sabali pay a P10,000 nu madanon iti edad 85, 90, ken 95.
Siniguro ti ahensiya iti naannayas a transition iti panangipatungpal dagiti nasao a linteg, nga iti agdama ket idadaulwan ti Department of Social Welfare and Development (DSWD).
Na-establisar ti National Commission of Senior Citizens (NCSC) iti sidong ti Office of the President idi 2019.
