Ilunglungalong ti National Food Authority (NFA) a maipaayanda ti emergency powers wenno espesial a bileg tapno direkta a makalako ti nalaklaka a bagas iti publiko iti kangitingitan ti ngumatngato a presio.
Tarigagay ti ahensia a maikkat dagiti “middlemen” ken direkta a makailako iti merkado tapno mapababa iti presio ti bagas.
Panggep ti ahensia a mapapartak iti panaggatang ti irik manipud kadagiti lokal a mannalon ken mapapartak iti panagpakiskis.
Planoda nga ilako ti bagas iti presio a ₱33 agingga ₱36 tunggal kilo kadagiti lokal a gobierno ken kadagiti Kadiwa stores, a mabalin met a mailako iti publiko ti nababbaba maiyarig iti commercial rice.
Iti sidong ti Rice Tariffication Law (RTL), limitado iti bileg ti NFA no sadino ilaklakoda dagiti bagas iti Food Terminal Inc. (FTI) wenno kadagiti Local Government Units (LGUs) sakbay a makasangpet kadagiti Kadiwa centers.
Gapu ta napnon dagiti bodega, kasapulanen nga iruarda dagiti daan a buffer stock (aging rice) tapno ikkan-dalan dagiti baro nga apit nga irik.
Ti singasing ket kas sungbat iti agtultuloy a panagngato ti presio ti bagas a dumanon ti ₱52 agingga ti nasurok ₱58 tunggal kilo kadagiti sumagmamano a lugar, ken kas panagsagana iti epekto ti dakkel a panagngato iti presio ti lana ken transportasion.
Segun kenni NFA Administrator Larry Lacson, no maaprobaran ti emergency power, naparpartak a makaballaet iti ahensia iti merkado tapno maksayan iti panagrigat dagiti umili.###
